पुणे : चतुरंग प्रतिष्ठानतर्फे होणाऱ्या ‘रंगसंमेलना’चे यावर्षी प्रथमच पुणे येथे आयोजन करण्यात आले आहे.
आजवरच्या रौप्यमहोत्सवी वाटचालीत २२ वेळा मुंबईत आणि तीन वेळा गोव्यात झालेल्या रंगसंमेलन सोहळ्यात लता मंगेशकर, पु. ल. देशपांडे, सुधीर फडके, बाबासाहेब पुरंदरे, डॉ. नारळीकर, डॉ. भटकर, साधना आमटे, पांडुरंगशास्त्री आठवले, डॉ. राम ताकवले यांसारख्या २६ दिग्गजांना ‘चतुरंग’चा जीवनगौरव पुरस्कार देण्यात आला आहे. यावर्षी हा पुरस्कार मूर्तीशास्त्र आणि भारतीय मंदिर स्थापत्यशास्त्र विषयांचे तज्ज्ञ, अभ्यासक-संशोधक डॉ. गो. बं. देगलूरकर यांना दिला जाणार आहे.
पुणे येथे प्रथमच होणाऱ्या या दोन दिवसीय रंगसंमेलन सोहळ्यात कलावंतांची गायन जुगलबंदी, ४० कलाकारांच्या सहभागाचा नेत्रदीपक नृत्याविष्कार, नाट्य अभिनय दर्शन, आंतरराष्ट्रीय ख्यातीच्या कलाकारांची वादन जुगलबंदी मैफल, ज्येष्ठ शिक्षणतज्ज्ञाची दर्जेदार मुलाखत, सुमारे अडीच हजार रसिकांच्या उपस्थितीत मान्यवर व मातब्बरांसह तासाभराचे एकत्रित चहापान संमेलन आणि दोन भव्य समारंभ असा भरगच्च कार्यक्रम असणार आहे. ‘रंगसंमेलना’चे उद्घाटन २७ नामवंत पुणेकर कलाकारांच्या हस्ते अभिनव पद्धतीने होणार आहे. ‘रंगसंमेलना’च्या ‘स्वागतयात्री योजने’ची नोंदणी पाच ऑक्टोबरपासून सुरू झाली आहे.
रंगसंमेलनाविषयी :दिवस : १६ व १७ डिसेंबर २०१७
वेळ : सायंकाळी चार ते १०
स्थळ : गणेश कला-क्रीडा रंगमंच, स्वारगेट, पुणे
अधिक माहितीसाठी संपर्क :32, पुष्पश्री, एस. पी. कॉलेजच्या मागे, सदाशिव पेठ, लोकमान्य नगर, पुणे. ९८९०४ ९०४९०, ७०३०२ ५५००४
संपर्काची वेळ : सकाळी नऊ ते ११ आणि सायंकाळी पाच ते आठ